Comeza os seus estudos musicais con doce anos baixo a tutela de Delio Represas Carrera, ampliándoos posteriormente nos conservatorios profesionais de Santiago de Compostela e Vigo, Conservatorio Mayeusis, Conservatorio Tradicional da Escola de Artes e Oficios de Vigo, e o Conservatorio Folque de Lalín.

Actualmente é titulado profesional en gaita galega, clarinete e saxofón, estando a piques de acadar o Título Superior en instrumentos da música tradicional e popular de Galicia no Conservatorio Superior de Música de Vigo. Formouse tamén noutras especialidades como a frauta de pico e a dirección de agrupacións musicais.

Recoñecido intérprete no panorama da música con instrumentos tradicionais galegos, foi galardoado en diferentes concursos de música tradicional, como o Memorial “Manuel Villanueva” ou o Memorial “Manuel Dopazo”. Tamén destaca a súa labor como solista con diferentes instrumentos (gaita, frauta de pico, ocarina ou zanfona), convidado por agrupacións tanto galegas (Banda Sinfónica da Federación Galega de Bandas de Música, Orquestra Filharmónica “Cidade de Pontevedra”, Bandas Municipais de A Coruña e Santiago de Compostela, etc.) como do resto da península (Banda Sinfónica Municipal de Madrid, Banda Municipal de Música de Santa Cruz de Tenerife, Banda Municipal de Palma, Banda Municipal de Villena, AMC d ́Albalat de la Ribera, Orquestra de Sopros de Viana do Castelo, etc.).

Ademais da súa faceta de intérprete, foi director da Banda de Música de Forcarei e da Banda Municipal de Ribadumia.

Con máis de vinte anos de experiencia docente, exerce como mestre de gaita, clarinete, saxofón, percusión tradicional, zanfona, coro, canto tradicional, linguaxe musical e conxunto tradicional en numerosas escolas de música das provincias de Pontevedra, A Coruña e Lugo.